नेपाल वाच । कर्णाली प्रदेशका मुख्यमन्त्री महेन्द्रबहादुर शाहीविरुद्ध उनी आवद्ध दल नेकपाकै सांसदहरुले अविश्वासको प्रस्ताव दर्ता गरेका छन् । कर्णाली प्रदेशमा नेकपाबाट ३३ जना सांसद रहेकोमा पूर्व एमालेका १३ र पूर्व माओवादीका ५ जना गरी १८ जनाले प्रस्ताव नेकपाको संसदीय दलमा दर्ता गराएका हुन् । शाही तत्कालीन माओवादी पक्षबाट मुख्यमन्त्री बनेका थिए । संसदीय दल र सरकारलाई प्रभावकारी रुपमा संचालन गर्न नसकेको निष्कर्ष निकाल्दै सांसदहरुले प्रदेशसभा संसदीय दलका प्रमुख सचेतकलाई पत्र बुझाएका हुन् । सरकार बनेयता शाहीको काम प्रभावकारी नभएको भन्दै दलको नेताबाट शाहीलाई हटाउन माग गरिएको छ । यसरी माग सांसदहरुमा यमलाल कँडेल, चक्रबहादुर शाही, करविर शाही, कुर्मराज शाही, अम्मरबहादुर थापा, सुशीलकुमार थापासहितका छन् ।