NepalWatch

News Portal For Eeverything In Nepal from Nepal

२०७९ असार १३ गते

कांग्रेसले भन्यो चीनले नेपाली भूमि मिच्यो, ‘प्रोटेस्ट नोट’ पठाउ

काठमाडौं । प्रमुख प्रतिपक्षी दल कांग्रेसले हुम्लामा चीनबाट नेपाली भूमि मिचिए पनि नेपाल सरकारले उल्टै ढाकछोप गरेको आरोप लगाएको छ । कांग्रेस प्रवक्ता एवं प्रचार विभाग प्रमुख विश्वप्रकाश शर्माले विज्ञप्ति जारी गर्दै भनेका छन्–‘हुम्लामा ‘चीनले सिमा मिचेको छैन’ भनेर हतारिएर टिप्पणी गर्ने सरकार सिमा अतिक्रमणको प्रमाण सार्वजनिक भइसक्दा पनि मौन बसेर त्यसलाई ढाकछोप गर्न प्रयत्नशील रहेको बिषयलाई नेपाली कांग्रेसले गम्भीरतापूर्वक लिएको छ ।’ बरु चीनले सीमा मिचेको भन्दै कांग्रेसले ‘प्रोटेस्ट नोट’ पठाएर कुटनीतिक माध्यमबाट समस्याको समाधान गर्न सरकारको ध्यानाकर्षण गराएको छ । सदरमुकाम सिमिकोटबाट ५० कोषमा रहेको नाम्खाको लिमिमा चीनले नेपालको सिमाना मिचेको चर्चा देशको राजधानीमा आइपुग्दा सरकारले ‘सिमा मिचिएको छैन’ भनेर परराष्ट्र मार्फत धारणा सार्वजनिक गरेको विषयमा कांग्रेसले भनेको छ–‘प्रमुख प्रतिपक्षी दलका रूपमा नेपाली कांग्रेसले ‘यस्तो प्रश्नमा हतारोमा टिप्पणी गर्नु गलत हुने अतः स्थलगत अध्ययनको प्रतिवेदन पश्चात् टिप्पणी गर्नु जिम्मेवार र परिपक्व हुने’ धारणा सार्वजनिक गरेको थियो । सरकारको धारणालाई हामीले तत्कालै ‘हतारोको टिप्पणी’ संज्ञा दिएका थियौं ।’ हुम्लास्थित स्थानीय प्रशासन, नेपाली सेना, सशस्त्र प्रहरी लगायतको नेतृत्वले असोज पहिलो सातामा स्थलगत अध्ययन गरेको प्रतिवेदन सरकारले सार्वजनिक नगरेपछि कांग्रेसले आफ्ना नेतालाई स्थलगत अनुगमनका लागि पठाएको दाबी गरेको छ । ‘असोज १४ गते कर्णाली प्रदेश सभाका विपक्षी नेता एवं नेपाली कांग्रेसका केन्द्रीय सदस्य जिवनबहादुर शाहीको नेतृत्वमा एक अध्ययन कार्यदल नाम्खा पुग्यो’ प्रवक्ताले जारी गरेको विज्ञप्तिमा उल्लेख छ, ‘चीनसँगको सिमामा सो भूगोलमा रहेका पिलर नम्बर ५ देखि १२ सम्मको सिमाक्षेत्रमा सो टोलीले ११ दिन लगाएर गरेको अध्ययन (प्रतिवेदन यहि वक्तव्य साथ संलग्न छ) को निष्कर्ष छ नाम्खाको लिमिमा चीन सरकारले करिब दुई किलोमीटर नेपाली भूमि अतिक्रमण गरेको छ ।’