काठमाडौं । नेकपाका अध्यक्ष प्रचण्डले प्रधानमन्त्रीले केपी ओलीले नेकपामा अब अलग भएर अघि बढ्न प्रस्ताव गरेको दाबी गरेका छन् । खुमलटारस्थित आफ्नै निवासमा नेताहरुसँग प्रचण्डले ओलीबाट यस्तो प्रस्ताव आएको खुलासा गरेका हुन् । लामो समयको संवादहीनतापछि प्रचण्ड ओलीलाई भेट्न शनिबार बालुवाटार पुगेका थिए । सोही भेटमा ओलीले शनिबार आफूसँग यस्तो प्रस्ताव राखेका प्रचण्डले आफू निकट नेताहरुलाई बताएका हुन् । खुमलटार भेलामा प्रचण्डसहित माधव नेपाल, झलनाथ खनाल, वामदेव गौतम, नारायणकाजी श्रेष्ठ, रामबहादुर थापा ‘बादल’सहितका नेताहरु सहभागी थिए । खुमलबाटार स्रोतका अनुसार प्रचण्डको बिफ्रिङपछि नेता खनाल र नेपालले पनि ओलीसँग अब सँगै अघि बढ्न नसक्ने बताएका थिए । तर, भेटमा सहभागी नेता बादलले भने स्थायी समितिको निर्णय कार्यान्वयन गरेर जानुपर्ने बताएको स्रोतको दाबी छ । तर, शनिबार ओलीले पार्टी र बैठकको निर्णय आफूले नमान्ने भन्दै अब अलगअलग भएर जाने बताएका थिए । मन्त्री हेरफेर गर्ने, कर्णालीका मुख्यमन्त्रीविरुद्द अविश्वास अघि बढाउनेसहितका गतिविधिपछि दुई अध्यक्षबीच दुरी बढ्दै आएको छ ।