काठमाडाैं । लामो रस्साकस्सीका बीच सुरु भएको नेकपाको सचिवालयको बैठक सुरु भएको ४० मिनेटमा नै सकिएको छ । नेकपा सचिवालयको अर्को बैठक भने आगामी ३ मंसिरको दिउँसो १ बजे बस्ने भएको छ । अबको बैठकमा नेकपाका दुई अध्यक्षले एक अर्कालाई लेखेको तीन पत्रमाथि छलफल हुने भएको छ । त्यसबेलासम्म दुवै अध्यक्षले एक अर्कामा दिएको पत्र र अन्तर पार्टी निर्देशिका समेत पढेर आउने गरी आजको बैठक सकिएको प्रवक्ता नारायणकाजी श्रेष्ठले जानकारी दिए । प्रवक्ता श्रेष्ठका अनुसार कार्यकारी अध्यक्षले प्रधानमन्त्री ओलीलाई बहुमत सदस्यसहित बैठक बोलाउने प्रस्तावमा सहमति जनाउन लेखेको पत्र, त्यसको जवाफमा ओलीले प्रचण्डलाई फर्काएको पत्र र फेरि प्रचण्डले ओलीलाई लेखेको पत्रबारे छलफल हुने भएको छ । प्रवक्ता श्रेष्ठका अनुसार आजको बैठकमा पार्टीमा उत्पन्न संकट र त्यसको समाधानबारे कार्यसूची बनाएर छलफल गरिने निष्कर्ष निकालिएको छ । उनले भने, ‘यस कार्यसूची अनुसार स्वभाविक रुपमा यसअघिको स्थायी समितिको निर्णयको कार्यान्वयन, कर्णाली, पर्सा लगायतमा भएको घटना, कोरोना रोकथाम, उपचार, नियन्त्रण र त्यसले पैदा गरेको आर्थिक संकट, यसबीचमा पार्टी र सरकारका सन्दर्भमा उठिरहेको विषय, भारतीय रअ प्रमुख लगायतको भ्रमणबारे पनि छलफल हुने छ । दुई अध्यक्षका तीन पत्रबारे पनि सचिवालयको बैठकमा छलफल हुने भएको छ ।