बेलायतमा कार्यरत नेपाली सेफ ३५ वर्षिय सन्तोष शाह युकेको चर्चित पाककला सम्बन्धी टेलिभिजन रियालिटी शो ‘मास्टरसेफ प्रोफेशनल यूके प्रतियोगिता २०२०’को फाइनल राउण्डमा प्रवेश गरेका छन् । सेमिफाइनल राउण्डमा योमरी बनाएर उनी मास्टर सेफ यूकेको १६ औ संस्मरणको फाइनल राउण्डमा पुग्न सफल भएका हुन् । गत साताको सेमिफाइनल राउण्डमा उनले योमरी परिकारको परिस्कृत रुप प्रस्तुत गरेका थिए । उनले प्रस्तुत गरेको योमरीमा चकलेट र काजु हालिएको थियो भने योमरी माथि सुन्तला र दालचिनी हालेर सजाइएको थियो । लगत्तै, उनले भारतीय–चिनियाँ शैलीको चिकन चिल्ली पस्किएका थिए । पाककला तथा प्रस्तुतीकरणबाट प्रभावित भएर कार्यक्रमका निर्णायकहरुले उनलाई सोझै फाइनल चरणमा प्रवेश दिएका थिए । मंगलबार हुने फाइनल राउण्डको प्रतिष्पर्धामा उनी अन्य पाँच प्रतियोगीहरुसँगै सहभागी हुनेछन् ।दुई राउन्डको हुने उक्त परीक्षणमा प्रतियोगीहरुको सिर्जनशीलता, गति तथा पाककलाको गुण जाँचिनेछ । उक्त प्रतियोगिताको अन्तिम नतिजा बिहीवार सार्वजनिक हुनेछ । जसमा विजेता घोषित हुनेछ । अन्तराष्ट्रिय स्तरमा नै प्रतिष्ठित मानिएको मास्टर सेफ प्रतियोगितामा नेपाली खाना पस्केर प्रतिष्पर्धा गर्ने सन्तोष पहिलो नेपाली सेफ हुन् । मास्टर सेफ यूकेमा नेपाली उत्कृष्ट परिकार पस्केकै कारणले उनले देश विदेशमा समेत चर्चा बटुलिसकेका छन् । मास्टर सेफको प्रतियोगिता नेपालमा सोझै हेर्न सकिदैन । तर धेरै नेपालीहरुले उनलाई सामाजिक सञ्जालमार्फत पछ्याउँदै आएका छन् । उनको शो यूट्यूवमा हेरिदै आएको छ । उनलाई नेपालका अर्बपति व्यापारी विनोद चौधरी, न्यूयोर्कका सेलिब्रिटी फेशन डिजाइनर प्रवल गुरुङ्गसहितका धेरैले बधाई सन्देशसमेत दिइसकेका छन् । सन्तोष साहको जन्म भारतको सिमाना नजिकै रहेको सिराहा जिल्लाको कर्जन्हा गाउँमा भएको हो । उनी दुई दिदी र पाँच दाजुहरु पछिका कान्छा हुन् । उनी पाँच वर्षको हुँदा उनको पिताको निधन भएको थियो । उनले १५ वर्षको उमेरबाट होटल क्षेत्रमा प्रवेश गरेका थिए । उनले विभिन्न होटलमा काम गरेर अनुभव बटुल्नुका साथै होटल व्यवस्थापनमा डिप्लोमा गरेका छन् । उनले एक पाँच तारे होटलमा ‘कार्यकारी शेफ’ को रुपमा समेत काम गरिसकेका छन् । उनी सन् २०१० मा बेलायत पुगेका थिए । उनी हाल बेलायतको एक प्रतिष्ठित सिनामन कलेक्सनमा प्रमुख शेफ तथा साफ्रन सर्कल यूकेमा कार्यकारी शेफका रुपमा कार्यरत छन् ।