काठमाडौं । संवैधानिक परिषद्को बैठक बुधबार बिहान ९ बजे बस्ने भएको छ । आज अपराह्न पाँच बजे बैठक बसे पनि कुनै निर्णय नगरेकोमा बुधबार बिहान बस्न लागेको हो । मंगलबारकाे बैठकमा संवैधानिक अंगमा नियुक्तिका सम्बन्धमा सैद्धान्तिक छलफल भएको र बुधबार पुनः बस्नेगरी बैठकको मिति तय भएको छ । यसअघि तय भएका बैठक सदस्यहरूको अनुपस्थितिका कारण बस्न सकेको थिएन । बैठक बस्न नसकेपछि सरकारले अध्यादेश नै जारी गरेर तत्काल बहाल रहेका बहुमत सदस्यले निर्णय गर्न सक्नेगरी कानूनी बाटो खुलाएको थियो । प्रधानमन्त्री ओली इतर खेमा र प्रतिपक्षी कांग्रेसले पनि अध्यादेशप्रति कडा आलोचना गरिरहेका छन् ।