काठमाडौं महानगरपालिकाले खुला मञ्चमा बनेका अस्थायी संरचना हटाउने कामलाई तिव्रता पारेको छ । पहिलो चरणमा केही संरचना र बारबेर हटाइसकेको महानगरले दोस्रो चरणमा डोजर लगाएर संरचना हटाउन थालेको हो । दरबार हाइस्कुलको निर्माण सम्पन्न भएको र वीर अस्पतालकोसमेत पुनर्निर्माण कार्य सम्पन्न चरणमा पुगेकोले बाँकी सामाग्री र संरचना हटाउन थालिएको महानगरका प्रमुख प्रशासकीय अधिकृत राजेश्वर ज्ञवालीले बताए । अस्थायी वसपार्कलाई अन्यत्र व्यवस्थापन गरेर भए पनि खुल्ला मञ्चलाई खुल्ला बनाउने योजना रहेको उनले बताए । नगर प्रहरी उपरीक्षक धनपति सापकोटाका अनुसार चिकित्सा विज्ञान राष्ट्रिय प्रतिष्ठान (न्याम्स), दरबार हाइस्कुल र राष्ट्रिय पुनर्निर्माण प्राधिकरणलाई पत्र काटेरै खाली गर्ने वातावरण बनाउन आग्रह गरिएको छ । हिजो (आइतबार) खुलामञ्चमा पुर्ननिर्माणका लागि निर्माण सामग्री राख्न बनाइएका टहरा वरिपरिका बार भत्काइएको छ । त्यहाँका अस्थायी संरचना क्रमश भत्काइने महानगरले जनाएको छ ।