प्रधानमन्त्री केपी शर्मा ओलीले एकैसाथ १६५ रणनीतिक सडकको शिलान्यास गरेका छन् । शनिबार प्रधानमन्त्री निवास बालुवाटारको सभाहलबाट उनले सडकको शिलान्यास गरेका हुन् । नेपालको पूर्वाधार विकासमा कोशेढुंगा मानिने निर्वाचन क्षेत्र रणनीतिक सडकको लागि एकीकृत रुपमा विकास गर्ने लक्ष्य राखेर सरकारले एकैसाथ शुभारम्भ गरेको हो । प्रत्येक निर्वाचन क्षेत्रमा एउटा रणनीतिक सडक छनोट गरी त्यसको दीर्घकालीन विकास गर्न लागिएको हो । शुभारम्भ कार्यक्रममा दुवै सदनका सांसदहरुको समेत सहभागिता छ । करिब ५७ अर्ब लागत अनुमान गरिएको यो परियोजना तीन वर्षभित्र सम्पन्न गर्नुपर्ने मापदण्ड बनाइएको छ । एक निर्वाचन क्षेत्र भएका हिमाली जिल्लामा ६० करोड, एक निर्वाचन क्षेत्र भएका पहाडी जिल्लामा ५० करोड, दुई निर्वाचन भएका जिल्लामा ४० करोड, तीन निर्वाचन क्षेत्र भएका जिल्लामा २५ करोड र काठमाडौंमा २० करोड रुपैयाँ लागत अनुमान गरिएको छ । दुई लेनको निर्माण हुने सडकको कूल लम्बाई दुई हजार दुईसय १० किलोटिमर कालोपत्रे हुने बताएको छ ।