तेस्रो लहरबाट बालबालिकालाई बचाउन सातै प्रदेशमा आईसियूसहितका छुट्टै अस्पताल बनाइने - Nepal Watch Nepal Watch

स्वास्थ्य-जीवनशैली

जेष्ठ २४, २०७८ सोमबार


तेस्रो लहरबाट बालबालिकालाई बचाउन सातै प्रदेशमा आईसियूसहितका छुट्टै अस्पताल बनाइने


काठमाडौं । सरकारले कोरोना महामारीको तेस्रो लहरबाट बालबालिकालाई जोगाउन विशेष ध्यान दिने भएका छन् । जसका लागि सातै प्रदेशमा बालबालिकाको छुट्टै उपचार गर्न अस्पताल र आइसियू निर्माण गरिने तयारी गरेको छ ।

तेस्रो लहरको चपेटामा बालबालिकाहरु जोखिममा रहेको विशेषज्ञहरुको सुझावपछि सरकारले यस्तो तयारी गरेको स्वास्थ्य तना जनसंख्या मन्त्री शेरबहादुर तामाङले जानकारी दिए ।

उनले भने, ‘विशेषज्ञहरुले तेस्रो लहरबाट बालिबालिकाहरुलाई बढी जोखिम भइरहेको सुझाव दिएका छन् । त्यसका लागि सातै प्रदेशमा कोभिड संक्रमित बालबालिकाको उपचारका लागि आईसियूसहितको बाल अस्पताल बनाइने छ ।’

उनले देशभरी रहेका बाल अस्पतालहरु, र बालचिकित्सकहरु कति छन् भन्ने अध्ययन गरेर अन्य तयारी थालिने जानकारी दिए । सोमबार मन्त्रालयमा भएको भुर्चअल पत्रकार सम्मेलनका क्रममा मन्त्री तामाङले बालबालिकालाई संक्रमणबाट जोगाउन सरकारले मुख्य प्राथमिकतामा राखेको बताए ।

उनले आफ्नो पहिलो प्राथमिकता नै जनताको जीवन रक्षा भएकाले सरकारले कोरोनाको लहरबाट नागरिकको जीउज्यान बचाउन हरसम्भव प्रयास गरिरहेको बताए । मन्त्री तामाङले यतिबेला सरकारी संयन्त्रणहरु सबै कोभिडविरुद्धको लडाइमा होमिएकाले सबैले साथ दिन अनुरोध गरे ।

साथै आगामी केही समयभित्रै नागरिकलाई निःशुल्क उपचारका लागि एक अध्ययन गरिने बताए । ‘स्वास्थ्य बिमामार्फत कति हुनसकिन्छ र अरु उपायहरु के के हुनसक्छन् । जसबाट नागरिकले निःशुल्क उपचार पाउन सकुन् । एक अध्ययन गरेर कार्यान्वयनमा ल्याइनेछ ।’

प्रतिक्रिया दिनुहोस्