काठमाडौं । काठमाडौं महानगरपालिकाभित्र रोकिएको कोरोना विरुद्धको खोप अभियान भोलिदेखि सुरु हुने भएको छ । ६० देखि ६४ वर्ष उमेर समूहकालाई कोभिडविरुद्धको (भेरोसेल खोप) काठमाडौँ महानगरपालिकाले रोकेको खोप पुनः सुचारू गर्ने भएको छ । यसअघि महानगरभित्रको सबै वडामा खोप कार्यक्रम सञ्चालन गरिए पनि २८ गतदेखि खोप लगाउने कार्यक्रम रोकिएको थियो । वडा–वडामा भिडभाड बढेकाले अस्पतालमा खोप लगाइने महानगरका कोभिड फोकल पर्सन ज्ञानु ओलीले जानकारी दिए । उनका अनुसार वीर अस्पताल, सिभिल अस्पताल, त्रिवि शिक्षण अस्पताल र वीरेन्द्र सैनिक अस्पतालमा खोप लगाइने छ । काठमाडौँ स्वास्थ्य कार्यालय, काठमाडौँ जिल्ला प्रशासन र काठमाडौँ महानगरपालिकाबीच पुनः खोप सञ्‍चालन कार्यक्रम कसरी गर्न सकिन्छ भनी छलफल भएको थियो । महानगरले १० देखि ११ हजार मानिसलाई खोप लगाउन सकिने बताएको छ । यसअघि महानगरले २५ गतेबाट ३२ वटै वडामा सञ्‍चालन हुँदै आएको खोप कार्यक्रम सरकारले खोप उपलब्ध नगराउने भएपछि स्थगित भएको थियो । तीन दिनमात्र खोप लगाएको थियो । ६० देखि ६४ वर्ष उमेर समूहका २८ हजार मानिसलाई खोप लगाइ सकिएको छ ।