अन्ततः ब्राजिललाई उसकै मैदानमा स्तब्ध पार्दै अर्जेन्टिनाले कोपा अमेरिकाको उपाधि जितेको छ । २८ वर्ष लामो ठूला उपाधिको खडेरीलाई तोड्दै लियोनेल मेसी प्रेरित अर्जेन्टिनाले कोपाको उपाधि जितेको हो । जुन उपाधिक लागि अर्जेन्टिनाको लागि फाइनलमा डि मारिया नायक बन्न पुगे । २१ औं मिनेटमा रोड्रिगो डे पउलको लामो पासमा डि मारियाले सुन्दर गोल गरेका थिए । निर्धारित ९० मिनेटसम्म यही एक गोलको नतिजाले अर्जेन्टिनाले ब्राजिललाई स्तब्ध पार्दै उपाधि जितेको हो । तीनवटा कोपा र एउटा विश्वकपको फाइनलमा स्तब्धपूर्ण हार बेहोरेका लियोनेल मेसीले अन्ततः प्रेरणादायी प्रदर्शन गर्दै टिमलाई कोपाको उपाधि जिताएका हुन् ।  उपाधिसँगै अर्जेन्टिनाले १५ औं पटक कोपाको उपाधि जितेको हो । जुन उरुग्वेसँगको बराबरी हो । फाइनलमा डि मारिया नायक बने पनि समूह चरणदेखि सेमिफाइनलसम्म मेसीले चार गाेल गर्नुका साथै पाँच गोलमा असिस्ट प्रदान गर्दै सबै खेलमा निर्णयक भूमिका निभाएका थिए । फाइनलसम्मकाे अाधार मेसीले काेरेपछि अन्तत: नायक डि मारिया बन्न पुगेका हुन् ।  उपाधिसँगै मेसीले ठूला प्रतियोगिता जित्न नसकेको आरोपलाई गलत सावित गर्दै ब्राजिललाई नै हराउँदै उपाधि दिलाउन सफल भएका हुन् ।