काठमाडौं । पटक–पटक स्थगित हुँदै आएको नेकपा (माओवादी केन्द्र)को केन्द्रीय कमिटी बैठक फागनु ८ मा बस्ने तयारी भएको छ ।

पुस १८ मा काठमाडौंमा भएको ८ औं महाधिवेशनले २३६ जनाको अपुरो केन्द्रीय कमिटी गठन गरेको थियो । महाधिवेशनपछि १९ मा ललितपुर सानेपामा बसेको पहिलो केन्द्रीय कमिटी बैठकले अध्यक्षमा पुष्पकमल दाहाल प्रचण्डलाई पुनः अध्यक्षमा चयन गरे पनि अन्य

पदाधिकारी चयन गर्न सकेको छैन । त्यसयता लगातार बैठक स्थगित हुँदै आएको छ ।

पछिल्लो समय एमसिसी र प्रधानन्यायाधीमाथिको महाभियोग प्रकरण पेचिलो बन्दै गएपछि यस विषयमा पार्टीको आधिकारिकक धारणा तय गर्न बैठक बस्न लागिएको हो । पदाधिकारी चयन र केन्द्रीय कमिटीलाई पूर्णता दिन आकांक्षी धेरै भएपछि दुई महिना यता बैठक निरन्तर स्थगित हुँदै आएको छ ।

त्यस्तै केन्द्रीय कमिटी बैठकबारे आफूलाई कुनै जानकारी नआएको नेता लेखनाथ न्यौपानेले जानकारी दिए । आगामी बैठकमा एमसिसीलाई अध्यक्ष प्रचण्डले पठाएको पत्र र यो संसद्बाट पारित गर्ने सम्बन्धमा कुरा उठाउने तयारी भएको जानकारी दिए ।

‘एमसिसी नेपालको राष्ट्रियतामाथि खतराको घण्टी हो । यसले नेपालको हित गर्दैन । यसलाई फिर्ता गर्नुपर्छ । एमसिसीका सम्बन्धमा अध्यक्षले पठाएको पत्रबारे पनि कुरा उठाउँछौं’, उनले भने, ‘केन्द्रीय कमिटी बैठकमा समग्र विषयवस्तुबारे छलफल हुने वातावरण बन्छ कि बन्दैन त्यो हेर्छौं । गर्नैपर्ने कामको एजेण्डा तय गर्ने छोटो समयको बैठक राखेर सकियो भन्ने माओवादीमा बढी छ । विषय वस्तुप्रतिको गम्भीरतालाई हेरी छलफलमा लैजाने र छलफलको निष्कर्षमा धारणा बनाउने अभ्यास भएको छैन । पूर्व निर्धारित धारणालाई औपचातिकता दिने बढी चलन छ । त्यसमा हाम्रो ध्यान बढी जानेछ ।’

त्यस्तै उनले अहिलेसम्म केन्द्रीय कमिटी र पदाधीकारीले पूर्णता नपाएको विषयमा असन्तुष्टि व्यक्त गरेका छन् ।

‘पार्टीको अवस्था लथालिङ्ग छ । भातृ संगठनहरूले अहिलेसम्म पूर्णता पाएका छैनन् । विभाग गठन हुन सकिरहेको छैन । नेताहरूले जिम्मेवारी पाएका छैन’, उनले प्रश्न गर्दै भने, ‘लथालिङ्ग संगठन हाम्रो पर्यावाची जस्तै भएको छ । यसरी कसरी नयाँ विचार र संगठन निर्माण हुन्छ ?’

पार्टीभित्र देखिएका विकृतिको अन्त्यका लागि आफूले जति पहल गरे पनि नेतृत्वप्रतिको चाकडी, चाप्लुसी प्रवृत्ति हावी भएकाले पार्टीमा सुधार गर्न नसकिएको उनले स्वीकार गरे ।