काठमाडौं । अख्तियार दुरूपयोग अनुसन्धान आयोगले शहीद गंगालाल राष्ट्रिय हृदय केन्द्रका तत्कालीन ल्याब इन्चार्ज विनोदकुमार यादवविरूद्ध मुद्दा दायर गरेको छ ।

यादवले पिसिआर टेस्टको रिपोर्ट नैै फेरबदल गरी लामो समयदेखि अनुचित लेनदेन गरेको भन्दै आयोगमा उजुरी परेको थियो ।

सोही उजुरीका आधारमा अनुसन्धान हुँदा यादवले प्रयोग गर्ने सिपियूको फरेन्सिक परीक्षण गर्दा फेला परेका सबै पिसिआर रिपोर्ट नक्कली भएको पाइएको छ । त्यस्तै, गलत प्रतिवेदन तयार पार्नका लागि यादवले शहिद गंगालाल राष्ट्रिय हृदय केन्द्रको छाप आफूखुशी बनाइ दुरुपयोग गरेको पाइएको छ ।

उनले अस्पतालमा भर्ना भएका मानिसको स्वाब संकलन गरी अनाधिकृत रूपमा रकम लिने र स्वाब परीक्षण नै नगरी आफूखुशी गलत पिसिआर रिपोर्ट तयार पार्ने गरेका थिए । परीक्षणका लागि भनेर स्वाब संकलन गर्ने तर वास्तविक रुपमा परीक्षण नै नगरी यादवले मौखिक रूपमै रिर्पोट नेगेटिभ भएको बताउँदै आएका थिए ।

अर्कोतर्फ आफ्नै कार्यकक्षमा स्वाब संकलन गर्ने र रिपोर्ट पोजेटिभ आएमा थप रकम लिएर नेगेटिभ आएको रिपोर्ट बनाइदिने गरेको खुलेको छ ।

यसरी विभिन्न मितिमा धेरैजनाको पिसिआर परीक्षण नै नगरी आफूखुशी गलत प्रतिवेदन तयार पारेको पुष्टि भएकाले यादवमाथि सजायको मागदाबी गर्दै मुद्दा दायर भएको हो ।

उनलाई अख्तियार दुरुपयोग अनुसन्धान आयोग ऐन २०४८ को दफा १८ र ३५ एवं भ्रष्टाचार निवारण ऐन २०५९ को दफा ३६ बमोजिम आज विशेष अदालत काठमाडौंमा मुद्दा दायर भएको हो ।