काठमाडौं । नयाँ बानेश्वरस्थित संघीय संसद् भवनअगाडि मुल गेटअगाडि प्रेसर कुकर राखेको आरोपमा प्रहरीले नेत्रविक्रम चन्द विप्लव समूहका एक कार्यकर्तालाई पक्राउ गरेको छ । संसद् भवनको मुख्य गेटैअघि राखिएको उक्त प्रसर कुकर शंकास्पद रहेको भन्दै प्रहरीले उनलाई पक्राउ गरेका हो ।

महानगरीय अपराध महाशाखाको टोलीले २१ वर्षीय सुवास महतलाई आज काठमाडौंबाट पक्राउ गरेको हो ।

उनी काभ्रेपलाञ्चोक भुम्लो गाउँपालिका– २ सिमथली निवासी हुन् । साथै उनी विप्लव नेतृत्वको नेकपानिकट अनेरास्ववियू क्रान्तिकारी पशुपति बहुमुखी क्याम्पस कमिटी अध्यक्ष रहेको प्रहरीले जनाएको छ ।

संसद्ले एमसिसी पास गरेको विरोधमा गत सोमबार (भोलिपल्ट) विभिन्न आठ वाम संगठनले नेपाल बन्दको आह्वान गरेका थिए । सोही दिन बिहान ‘नो एमसिसी’ लेखिएको विद्युतीय तारजडान गरिएको प्रेसर कुकर राखिएको थियो ।

नेपाली सेनाको बम डिस्पोजल टोलीले डिस्पोज गरेको थियो । सो क्रममा कुकरभित्र इँटा र कागजका टुक्रा फेला परेको प्रहरीले जनाएको छ ।

सिसिटिभी फुटेजका आधारमा मोटरसाइकलमा आएका युवाले उक्त प्रेसर कुकर राखेर भागेको प्रहरीको दाबी छ ।