चितवन । चितवन राष्ट्रिय निकुञ्जमा गोहीका ५१९ अण्डा संकलन गरिएको छ । निकुञ्ज हुँदै बग्ने राप्ती र नारायणी नदीबाट घडियाल गोहीका ५१९ बटा अण्डा संकलन गरिएको हो ।

उक्त नदीको किनारमा भेटिएको १६ वटा गुडबाट अण्डा संकलन गरिएको निकुञ्जका गोही प्रजनन केन्द्र हेर्दै आएका सरोजमणि पौडेलले जानकारी दिए । पौडेलका अनुसार राप्तीका १० गुड र नारायणीका ६ गडुबाट अण्डा संकलन गरिएको तथा उक्त दुई नदीमा भेटिएका मध्ये आठ वटा गुडका अण्डा नल्याइएको उनले बताए ।

उक्त नदीबाट गत वर्ष चार सय ३६ वटा अण्डा ल्याइएको र सो अण्डाबाट गोहीले दुई सय ५८ वटा बच्चा कोरलिएको पौडेलले उल्लेख गरे । विगत दुई वर्षदेखि प्रजनन केन्द्रमा गोहीले पारेको अण्डाबाट बच्चा नकोरलिएको उनले बताए । यँहा ०३५, ०३६ र ०६७ सालका एक भाले र १२ वटा पोथी गोही रहेको तथा त्यस पछिका साना र ठूला गरी पाँच सय ३१ वटा गोही रहेका उनले जानकारी गराए ।

पौडेलले प्रजनन केन्द्रमा भाले गोही बुढो भएको कारण बच्चा नकोरलिएको अनुमान गरेका छन् । त्यस्तै उनले अन्य गोही साना भएकाले भाले वा पोथी पहिचान गर्न नसकेकोसमेत जनाएका छन् । उनले राप्ती तथा नारायणी नदीमा पाँच वटा भाले गाही देखिएको बताए । साथै उनले राप्ती तथा नारायणीमा अण्डा संकलन गरी बच्चा कोरलेर हुर्काएपश्चात नदीमै पुन नदीमै छाड्ने गरिएको उल्लेख गरे ।

हालसम्म राप्ती, नारायणी, कोसी र बबई नदीमा एक हजार ६ सय ९२ गोही छाडिसकेको उनले जानकारी दिए । त्यस्तै निकुञ्जले वि.स २०३५ सालमा गोही प्रजनन केन्द्र स्थापना गरी प्रजनन केन्द्रमा हुर्काइएका गोहीका बच्चा नदीमा नै छाड्दै आएको छ ।