काठमाडाैं । राज्यले पुरुषहरुलाई भन्दा २५ प्रतिशत महिलालाई जग्गा खरिद विक्रीमा राजस्व छुट दिएसँगै महिलाका नाममा जग्गा पास गर्नेको संख्या झापामा बढेको छ ।

भूमिसुधार तथा मालपोत कार्यालय भद्रपुरको आर्थिक वर्ष २०७८/७९ को तथ्यांक अध्ययन गर्दा सो देखिएको हो । एक वर्षको अवधिमा ११ हजार ६७९ महिलाको नाममा जग्गा नामसारी गर्दा ५१ करोड ४२ लाख एक हजार ५१३ राजश्व छुट दिइएको छ । अघिल्लो आवमा सात हजार ६१ वटा लिखद पास गर्ने महिलालाई ३९ करोड २१ लाख आठ हजार ४२६ राजस्व छुट दिइएको थियो ।

अघिल्लो वर्षका तुलनामा गत वर्ष राजस्व छुट बढेको छ । कार्यालयका खरिदार ज्ञानेन्द्रप्रसाद भण्डारीका अनुसार नगर तथा ग्रामीण क्षेत्रका दलितहरुलाई १० लाख २२ हजार १७७, सहिद परिवारलाई ११ हजार ६५० र पतिपत्नीको संयुक्त नाममा लिखद पास गर्ने पाँचलाई २३ हजार ४४२ राजस्व दिइएको छ ।

परिचयपत्रको आधारमा अपांग, महिला र दलितलाई २५ प्रतिशत र एकल महिलालाई ३५ प्रतिशतसम्म राजस्वमा छुट दिने गरेको उनको भनाइ छ । यस कार्यालयबाट झापाको माईपूर्वका १० वटा स्थानीय तहको जग्गा किनबेचको पास हुने गरेको छ ।

कार्यालयले गत आव २०७८र७९ मा ८३ करोड २८ लाख नौ हजार ८३१ राजस्व संकलन गरेको छ । कार्यालयले पुँजीगत लाभकर शीर्षकबाट २३ करोड ४१ लाख ७३ हजार २३५ रूपैयाँ, अग्रीम कर १० करोड ८४ लाख चार हजार ७८ रूपैयाँ, डोर शीर्षक वापत चार लाख २५ हजार रूपैयाँ राजस्व उठाएको हो ।

कार्यालयले एक वर्षको अवधिमा ५१ हजार १९६ लिखद दर्ताबाट सो संख्या बराबरको राजश्व संकलन गरेको हो । मेचीनगर, भद्रपुर, कचनकवल, बिर्तामोड, हल्दीवारी, बाह्रदशी, झापा, अर्जुनधारा, कनकाई र बुद्धशान्तिसहितका १० वटा स्थानीय तहका जग्गाको  किनबेचलगायत सम्पूर्ण कारोबार गर्ने यस कार्यालयले सबैभन्दा बढी बिर्तामोड नगरपालिकाबाट २० करोड ४५ लाख ५९ हजार ४९५ रूपैयाँ र सबै भन्दा कम झापा गाँउपालिकाबाट ७३ लाख ३३ हजार ७३४ रूपैयाँ राजश्व संकलन गरेको कार्यालयले जनाएको छ ।