काठमाडौं । सत्तारूढ दल माओवादी केन्द्र र बाबुराम नेतृत्वको नेपाल समाजवादी पार्टीबीच एउटै निर्वाचन चिन्ह लिने सहमति अनुमोदन गर्न प्रचण्डले पूर्वस्थायी समिति बैठक बोलाएका छन् ।

आइतबार प्रचण्ड र बाबुरामबीच आगामी प्रतिनिधिसभा र प्रदेशसभा निर्वाचनमा एउटै चुनाव चिन्हमा उठ्ने सहमति भएको थियो । दुई दलबीच भएको सहमति अनुमोदनका लागि मंगलबार बिहान ८ बजे बैठक बोलाइएको नेता हरिबोल गजुरेलले जानकारी दिए । उनका अनुसार भट्टराईसँग भएको सहमति अनुमोदन गर्नुको साथै उम्मेदवार छनोट प्रक्रिया र मापदण्डबारे छलफल हुनेछ ।

‘माओवादी केन्द्र र भट्टराईजीको पार्टी गोलाकार हसिँया हतौडा चुनाव चिन्ह लिएर आगामी निर्वाचनमा भाग लिने सहमति भएको छ’, गजुरेलले भने, ‘एकीकृत समाजवादी, जसपा, राजमोलगायत दलसँग संयन्त्र बनाएर चुनावी प्रतिस्पर्धा गर्ने सहमति भएको छ ।’

यसैविषयमा भएको सहमति अनुमोदनका लागि भट्टराईले पनि केन्द्रीय समिति बैठक बोलाएका छन् । गजुरेलले दुवै पार्टीबाट सहमति अनुमोदन भएपछि सहमतिमा संयुक्त हस्ताक्षर हुने बताए ।

त्यस्तै गठबन्धन दलहरूबीच भागबण्डामा माओवादीले कम्तिमा ५५ सिट दाबी गर्ने भएको छ । गठबन्धन दलहरूबीच संघमा १६५ र प्रदेशमा ३३० प्रत्यक्ष निर्वाचन क्षेत्रमा सिट बाँडफाँटबारे कार्यदलस्तरमा छलफल जारी रहेको छ ।

‘माओवादीले अघिल्लो निर्वाचनमा प्रत्यक्षतर्फ ३६ सिट जितेको थियो । अहिले हामी कम्तिमा ५५ सिट दाबी रहन्छ । सिट बाँडफाँटका लागि गठबन्धन दलहरूबीच मापदण्डबारे छलफल भएको छ । यसका लागि अघिल्लो पटक चुनावमा दलहरूले जितेको सिट र स्थानीय तहमा दलहरू जितेको मतका आधारमा मापदण्ड बनाउनेबारे छलफल जारी छ’, गजुरेलले भने ।

अघिल्लो निर्वाचनमा गठबन्धनले जितेको क्षेत्रमा यथावत राखी एमालेले जितेको क्षेत्रमा भागबण्डा गर्नेगरी छलफल अगाडि बढेको उनले जानकारी दिए । २०७४ को निर्वाचनमा एमालेसँग चुनावी तालमेल गर्दा माओवादीले ६५ सिट पाएको थियो ।