NepalWatch

News Portal For Eeverything In Nepal from Nepal

२०८० चैत १५ गते

गम्भीर अपराधमा मुद्दा खेपेका कांग्रेस नेताहरू धमाधम उम्मेदवार सिफारिस

काठमाडौं । बालुवाटारको ललिता निवासप्रकरणमा मुछिएका विजयकुमार गच्छदारलाई कांग्रेसले सुनसरी–३ बाट सर्वसम्मत उम्मेदवार बनाएको छ ।

कांग्रेस सुनसरी–३ क्षेत्रीय समितिले निलम्बित सांसद गच्छदारलाई प्रतिनिधिसभा सदस्यका लागि सर्वसम्मत सिफारिस गरेको हो ।

बालुवाटारको ललिता निवासको जग्गाप्रकरणमा गच्छदारविरुद्ध अख्तियार दुरूपयोग अनुसन्धान आयोगले दायर गरेको मुद्दा अहिले पनि विशेष अदालतमा विचाराधीन छ ।

अघिल्लो निर्वाचनमा एमालेका सांसद भगवती चौधरीलाई पराजित गरी प्रतिनिधिसभा सदस्यमा निर्वाचित भएका थिए । गच्छादार २०४८ देखि निरन्तर प्रतिनिधिसभा सदस्यमा निर्वाचित हुँदै आएका छन् । आयोगले २०७६ माघ २२ मा उनीविरुद्ध भ्रष्टाचार मुद्दा दायर गरेपछि संसद सचिवालयले उनलाई सांसदबाट निलम्बित गरेको थियो ।

यसअघि सामुहिक हत्या आरोपमा मुद्दा खेपेका मोहम्मद अफताव आलमलाई रौतहट–२ बाट सर्वसम्मत उम्मेदवार सिफारिस गरेको थियो ।