काठमाडौं । अन्तर्राष्ट्रिय महिला दिवसको अवसरमा ममता झालाई चन्द्रलोक प्रतिष्ठानले ‘राष्ट्र नारी सम्मान २०७९’ प्रदान गरेको छ । उनको उदाहरणीय नेतृत्व र समाज र समुदायप्रति समर्पणको कदर गर्दै उनलाई उक्त सम्मान गरिएको हो ।

ममता जनमत पार्टीको सप्तरी इन्चार्ज र मधेसी नेताको रुपमा पछिल्लो समय परिचित छन् । उनी आफ्नो समुदायको कल्याणको लागि, विशेष गरी महिला सशक्तिकरणको लागि सधैं साहसी र प्रतिबद्ध एक महिला समाजसेवी पनि हुन ।

‘राष्ट्र नारी सम्मान’ समुदाय र देशका लागि महत्वपूर्ण योगदान पुर्याउने महिलालाई दिइने राष्ट्रिय पुरस्कार हो । उनलाई उनको उत्कृष्ट उपलब्धि र नेतृत्वलाई मान्यता दिने विशेषज्ञहरूको प्यानलद्वारा यस सम्मानको लागि चयन गरिएको थियो।

यस्तै उनी बाहेक अन्य थुप्रै महिलाहरुलाई पनि समाजमा योगदान पुर्याएको भन्दै सम्मानित गरिएको छ । काठमाडौंमा आयोजीत एक कार्यक्रममा विभिन्न संघसंस्थाका प्रतिनिधि, सरकारी अधिकारी, सामुदायिक अगुवा लगायत विशिष्ट अतिथिहरुको उपस्थिति रहेको थियो ।

सम्मान ग्रहण गर्दै ममता झाले आफुलाई दिइएको उक्त मान्यताको लागि आफु सदैव कृतज्ञ रहेको बताइन् । कार्यक्रममा बोल्दै उनले भनिन, ‘मेरो यो यात्रामा सहयोग गर्ने सबैलाई धन्यवाद । अब मैले आफ्नो समुदायको उन्नतिको लागि अथक परिश्रम गर्नेछुु ।’ उनले आफुले ग्रहण गरेको पुरस्कार सबै महिलाहरूलाई समर्पित पनि गरिन् ।