काठमाडौं । पूर्वप्रधानमन्त्री एवं एमाले अध्यक्ष केपी ओलीले २०८४ को निर्वाचनअघि एमालेसँग सहकार्य नुहने कांग्रेस महामन्त्री गगन थापालाई जवाफ फर्काएका छन् ।

शुक्रबार उपराष्ट्रपति निर्वाचनमा मतदान गरेपछि सञ्चारकर्मीसँग कुराकानी गर्दै ओलीले प्रतिपक्षसँग भेट्न कति साल कुनुपर्छ भन्ने एकजना कांग्रेसीसँग अहिले भेट भएको छैन भनि प्रश्न गरेका छन् । महामन्त्री थापाले भनेजस्तो कांग्रेस र एमालेबीच सहकार्य हुन्छ त भनेर सञ्चारकर्मीले सोधेका प्रश्नको जवाफ ओलीले आज फर्काएका हुन् ।

‘अस्ति मैले सहकार्य कहिल्यै हुँदैन भनेर कसम खाएको छैन भनेको थिएँ । एकजना अलिक चर्का कांग्रेसले कति सालपछि प्रतिपक्षमा उहाँसँग भेटघाट हुन्छ भन्नु भएछ । प्रतिपक्षमा भेट्न ०८४ साल पर्खिनु पर्छ, अहिले भेट्नु भएको छैन ?’, ओलीले प्रतिपश्न गरे ।

२५ फागुनमा भएको राष्ट्रपति निर्वाचनमा थापाले एमालेसँग २०८४ को निर्वाचनअघि सहकार्य सम्भव नभएको प्रतिक्रिया दिएका थिए ।