एजेन्सी । विश्वका शीर्ष अर्बपतिको सूचीमा ठूलो फेरबदल भएको छ । टेस्ला, स्पेसएक्स र ट्विटरका मालिक एलोन मस्क पुन: विश्वकै सर्वाधिक धनी व्यक्ति बनेका छन् । ब्लुमबर्गको सूची अनुसार उनी १९२ अर्ब डलरको कुल सम्पत्तिका साथ अर्बपतिको सूचीमा पहिलो स्थानमा छन् । बर्नार्ड अर्नाल्ट अहिले १८७ बिलियन डलरको कुल सम्पत्तिका साथ दोस्रो नम्बरमा झरेका छन् ।

आर्नल्ट गत डिसेम्बरमा मस्कलाई पछि पारेर ब्लुमबर्गको सूचीमा पहिलो नम्बरमा आएका थिए । त्यसबेला, प्रविधि कम्पनीहरुको सेयरमा गिरावट आएपछि मस्कको नेटवर्थ खस्किएको थियो । यद्दपि, यस वर्ष भने मस्कको नेटवर्थ हालसम्म ५५.३ अर्ब डलरले वृद्धि भइसकेको छ ।

पछिल्ला केही दिनयता बर्नार्ड अर्नाल्टको नेट वर्थमा तीव्र गिरावट आएको छ। ४ मे २०२३ को ब्लूमबर्ग डाटा अनुसार, उनले २४ घण्टा भित्र ११.२ अमेरिकी बिलियन डलर वा लगभग ९२ हजार  करोड रुपैयाँ घाटा बेहोरेको थियो।