काठमाडाैं । प्रधानमन्त्री केपी ओलीसँगको भेटवार्ता सकेर नेकपाका कार्यकारी अध्यक्ष पुष्पकमल दाहाल प्रचण्ड पार्टी कार्यालय धुम्बाराही गएका छन् । बालुवाटार स्रोतका अनुसार उनीहरुबीचको भेटवार्ता सकारात्मक नभएको जनाइएको छ । प्रचण्ड ओलीसँगको भेट सकिएसँगै सचिवालयको बैठकको अध्यक्षता गर्न धुम्बाराही निस्किएका हुन् । उनी अहिले धुम्बाराही पुगिसकेका छन् भने अन्य सचिवालयका नेताहरु आउने क्रममा रहेका छन् । मुख्यगरी कर्णाली प्रदेशका मुख्यमन्त्रीविरुद अविश्वासको प्रस्ताव, मन्त्रीहरु हेरफेर, रअका प्रमुखको नेपाल भ्रमणपछि दुई अध्यक्षबीच दुरी बढ्दै गएको छ । प्रधानमन्त्री ओलीले नै पार्टी फुटाएर अघि बढौं भन्ने प्रस्ताव गरेपछि नेकपाको आन्तरिक राजनीति झन् ध्रुवीकरणतिर गएको छ । प्रचण्डसँग दुरी बढेपछि ओलीले माधव नेपाललाई बोलाएर प्रधानमन्त्री वा पार्टी अध्यक्ष दुई मध्ये एक रोज्न आग्रह गरेका थिए । तर, संकटमा नेताहरुलाई आश्वासन दिने तर, अघिपछि निरन्तर पेल्ने ओलीको स्वभाव रहेको भन्दै पछिल्लो समय प्रचण्ड, माधव नेपालसहितका नेताहरु ओलीविरुद्ध खुलेरै लागेका छन् ।