काठमाडाैं । तनहुँ घटना प्रकरण एवं वर्तमान सरकारको विकृति विसंगती, भ्रष्टाचार एवं ज्यादतीका विरुद्ध नेपाल विद्यार्थी संघले बिहीवार काठमाडौंको कोटेश्वरमा विरोध प्रदर्शन गरेको छ । नेपाल विद्यार्थी संघ कोटेश्वर बहुमुखी क्याम्पस इकाइको आयोजनामा कोटेश्वर क्याम्पसबाट सुरु भएको र्‍याली कोटेश्वर चोकमा पुगी कोणसभासहित समापन भएको थियो । कोणसभालाई सम्बोधन गर्दै नेविसंघ महामन्त्री वलदेव तिमल्सिनाले केपी ओली नेतृत्वको कम्युनिस्ट सरकार पूर्णरुपमा सर्वसत्तावादतर्फ उन्मुख भएको बताउँदै नागरिकको स्वतन्त्रतामाथि बन्देज लगाउने , विनाकारण पक्राउ गर्ने जस्ता घटनाले ओली नेतृत्वमा पंचायती या राणाकालीन भूत सवार भएको बताए । तिमल्सिनाले तनहुँमा पार्टी वरिष्ठ नेता रामचन्द्र पौडेललाई प्रहरीले पक्राउ गरी अभद्र व्यवहार गरिएकोमा देशभरका कार्यकर्तालाई आन्दोलित हुन आह्वान गरे । पुर्व केन्द्रीय सदस्य रत्नहरी ढुंगेलले पछिल्लो समयको घटनक्रमले प्रहरी प्रशासनको विश्वासनियतामाथि ठूलो प्रश्न उठेको भन्दै वर्तमानमा नेपाल प्रहरीले कुनै पनि घटना अनुसन्धान गर्ने नैतिकता गुमाइसकेको आरोप लगाए । बलात्कारी, हत्यारा र तस्करीहरुको संरक्षण गर्ने तर इतिहासमा कुनै दाग नलागेको नेपाली कांग्रेसका वरिस्ठ नेता रामचन्द्र पौडेललाई पक्राउ गरेर सरकारले देशको बेइज्जत गरेको उनको भनाई छ । यो लोकतान्त्रिक व्यवस्थाको उपहास हो भन्दै ढुंगेलले सबै लोकतन्त्रप्रेमीहरुलाई आन्दोलित हुन अपिल गरे । सभामा नेविसंघ महामन्त्री बलदेव तिमल्सिना, पूर्व केन्द्रीय सदस्य रत्नहरी ढुंगेल, नेताहरु रामकृष्ण खड्का, मनिष रायमाझी, एन्जर कार्की, राम केसी लगायतले सम्बोधन गरेका थिए ।