NepalWatch

News Portal For Eeverything In Nepal from Nepal

२०७९ असार १८ गते

पोखरा महानगरमा एकीकृत समाजवादीका आचार्यको मतान्तर बढ्दै

काठमाडौं । स्थानीय तह सदस्य निर्वाचन–२०७९ अन्तर्गत पोखरा महानगरपालिकाको जारी मतगणनामा सत्तारूढ गठबन्धनबाट प्रमुखका साझा उम्मेदवार नेकपा (एकीकृत समाजवादी)का धनराज आचार्यको मतान्तर बढ्दै गएको छ ।

महानगरको वडा नं १, २, ३, ४, १२, १३ २३, २४ र २५ को हालसम्म १३ हजार ८९७ मत गणनामा आचार्यले पाँच हजार ६९० मतसहित अग्रता बनाएका हुन् । उनका प्रत्याशी नेकपा (एमाले)का कृष्णबहादुर थापाले पाँच हजार ५० मत ल्याएका छन् । महानगर प्रमुखमा ६४० मतान्तरले आचार्य अघि छन् ।

यसैगरी उपप्रमुखमा कांग्रेसका कोपिला रानाभाट झिनो मतसहित अघि छिन् । रानाभाटले पाँच हजार ७१९ मत प्राप्त गर्दा एमालेका मञ्जुदेवी गुरुङको पाँच हजार ६८७ मत छ ।

हालसम्म महानगरका तीन वडाको अन्तिम मत परिणाम सार्वजनिक भएकामा वडा नं १ मा एमाले र वडा नं २ र वडा नं १२ मा नेपाली कांग्रेसका उम्मेदवार वडाध्यक्षमा विजयी भएका हुन् । कास्कीमा पाँच पालिकामध्येमा हालसम्म रुपा र माछापुच्छ«ेको अन्तिम मत परिणाम सार्वजनिक भएको छ ।

रुपामा अध्यक्ष र उपाध्यक्षसहित बहुमत वडामा एमाले र माछापुच्छ«ेमा अध्यक्ष र उपाध्यक्षसहित सात वडामा कांग्रेसका उम्मेदवार विजयी भएका छन् । यसैगरी गणना जारी रहेका अन्नपूर्ण र मादी गाउँपालिकामा नेपाली कांग्रेसका उम्मेदवारको अग्रता छ ।