काठमाडौं । भक्तपुरको चाँगुनारायण नगरपालिका वडा नम्बर ७ मा वडाध्यक्षविरुद्ध पक्राउ पुर्जी जारी भएको छ । निर्वाचित भएको हप्तादिनमै वडाध्यक्ष श्यामकृष्ण नायजु श्रेष्ठविरुद्ध ठगी तथा फौजदारी आरोपमा पक्राउ पुर्जी जारी गरिएको हो ।

वडाध्यक्षा श्रेष्ठविरुद्ध सरकारी जग्गा बैना गरी कीर्ते गरेको आरोप लागेको छ । यसै आरोपमा उनीविरुद्ध प्रहरीमा उजुरी परेको थियो ।

उक्त मुद्दामा केशवप्रसाद अधिकारी र ईश्वर गाइँजुलाई प्रहरीले पक्राउ गरिसकेको छ । तर वडाध्यक्ष श्रेष्ठसहित चार जना भने फरारको सूचीमा छन् ।

प्रहरीले फरार रहेको भनिएका श्रेष्ठ नियमित कार्यालय आइरहेको उनीनिकटहरूको भनाइ छ । तर, सेवाग्रहीहरूले भने उनलाई भेट्न नसकिरहेको बुझिएको छ ।

श्रेष्ठ गत स्थानीय तह निर्वाचनमा चाँगुनारायण नपा ७ नम्बर वडाको अध्यक्षमा राप्रपाबाट निर्वाचित भएका थिए ।