NepalWatch

News Portal For Eeverything In Nepal from Nepal

२०७९ असार १८ गते

सम्झौताविपरित गिट्टी बालुवा दोहन गर्न दिने जीतपुरसिमरा उपमहानगरका अधिकृतविरूद्ध भ्रष्टाचार मुद्दा

काठमाडौं । अख्तियार दुरूपयोग अनुसन्धान आयोगले जीतपुरसिमरा उपमहानगरपालिकाका तत्कालीन प्रमुख प्रशासकीय अधिकृतसहित दुईविरूद्ध भ्रष्टाचार मुद्दा दायर गरेको छ ।

आयोगले तत्कालीन प्रमुख प्रशासकीय अधिकृत शिवराज सेढाई, न्यू पाथिभरा सप्लायर्स हेटौंडा–४, मकवानपुरका प्रोपाइटर मिराकुमारी श्रेष्ठ र उक्त सप्लायर्स कम्पनीविरूद्ध राजस्व चुहावटको आरोपमा मुद्दा दायर गरेको हो ।

उपमहानगरपालिकाले न्यू पाथिभरा सप्लायर्स, हेटौंडासँग सम्झौता विपरित नियमित रूपमा गिट्टी बालुवा उत्खनन, बिक्री वितरण कार्य गर्न दिएको पाइएको छ। यस्तो कार्यमा उपमहानगरपालिकाकै कर्मचारीको संलग्नतामा अनियमितता भएको भन्ने उजुरी परेको थियो ।

उपमहानगरपालिकाका तत्कालीन प्रमुख प्रशासकीय अधिकृत सेढाईंले बालगंगा खोलाबाट खोलाजन्य पदार्थ उत्खनन, संकलन तथा बिक्री गर्ने गरी न्यू पाथिभरा सप्लायर्स हेटौँडा–४, मकवानपुरसँग सम्झौता गरेका थिए ।

सम्झौता गर्दा ठेकेदार कम्पनीबाट दुई किस्तावापत हुन आउने रकमको कार्य सम्पादन जमानत लिनुपर्ने थियो । तर, सेढाइंले सो रकम नलिई सम्झौता गरेको अनुसन्धानमा खुलेको छ । अनुसन्धानका क्रममा उक्त कम्पनीले  रु.१,२०,२८,०९० राजश्व चुहावट गरेको पाइएको छ ।

सेढाईलाई एक करोड बीस लाख अठ्ठाइस हजार नब्बे रुपैयाँ बिगा रकम माग दाबी सँगै कैद सजायको मागदाबी गरिएको छ ।

साथै न्यू पाथिभरा सप्लायर्स, हेटौडा–४, मकवानपुरलाई एक करोड छैसठ्ठी लाख बहत्तर हजार छ सय रुपैयाँ बिगो माग दाबी गरिएको छ ।