काठमाडौं । सरकारले आर्थिक वर्ष २०८०/८१ को लागि ल्याएको बजेटमा व्ययतर्फ १ करोड रूपैयाँ नै गायब भएको छ । जेठ १५ अर्थमन्त्री डा. प्रकाशशरण महतले संसदमा प्रस्तुत गरेको १७ खर्ब ५१ अर्ब ३१ करोड रूपैयाँको बजेटमा व्ययतर्फ एक करोड रकम अपुग देखिएको छ ।

कुल विनियोजन रकममध्ये आयतर्फ राजश्वमा १२ खर्ब ४८ अर्ब ६२ करोड उठ्ने अनुमान गरिएको छ । त्यस्तै अनुदानतर्फ ४९ अर्ब ९४ करोड र ऋणतर्फ ४ खर्ब ५२ अर्ब ७५ करोड रहेको छ ।

त्यस्तै ११ खर्ब ४१ अर्ब ७८ करोड रूपैयाँ चालुतर्फ, ३ खर्ब २ अर्ब ७ करोड पुँजीगतर्फ र ३ खर्ब ७ अर्ब ४५ करोड वित्तिय व्यवस्थातर्फ छुट्याएको छ ।

तीनै क्षेत्रमा छुट्याएको बजेट जोड्दा १७ खर्ब ५१ अर्ब ३० करोड रूपैयाँको मात्रै हिसाब देखिन्छ । यसबाट अर्थमन्त्रालले प्रस्तुत गरेको बजेटमा १ करोड रूपैयाँको गढबढ स्पष्टसँग देखिएको छ ।