काठमाडौं । कुवेतमा आयोजना हुने एएफसी एसिया कप छनोट खेलअघि तयारीका लागि नेपाली राष्ट्रिय फुटबल टोली बुधबार कतार प्रस्थान गरेको छ ।

नेपाली टोलीले करिब ९ दिन कतारमा तयारी गर्नेछ । यस्तै नेपालले कतारमा ओमान र टिमोर लिस्टेसँग मैत्रीपूर्ण खेल खेल्नेछ । नेपाली टोली कतारबाटै कुवेत जानेछ ।

स्ट्राइकर नवयुग श्रेष्ठको कप्तानीमा नेपालले एसिया कप छनोट खेल्नेछ ।

मुख्य प्रशिक्षक अब्दुल्लाह अलमुताइरीले किरण चेम्जोङको स्थानमा मंगलबारमात्र नवयुगलाई कप्तानीको जिम्मेवारी दिएका हुन् ।

नेपालले जुन ८ देखि १४ सम्म छनोट खेलहरू खेल्नेछ । जुन ८ मा नेपालले जोर्डन, ११ मा कुवेत र १४ मा इन्डोनेसियाविरुद्ध खेल्ने तालिका छ ।

नेपाली टोलीलाई मंगलबार साँझ अखिल नेपाल फुटबल संघ (एन्फा)ले बिदाइ गरेको थियो ।

किरणलाई हटाएर नवयुगलाई कप्तान बनाइयो – NepalWatch